Një operacion ndërkombëtar i kordinuar mes autoriteteve italiane, spanjolle dhe shqiptare, me mbështetjen e Europolit, ka çuar në shkatërrimin e një rrjeti të fuqishëm trafiku droge, pjesë e mafies kalabreze “’Ndrangheta”.
Në pranga ranë 28 persona, përfshirë shtetas shqiptarë dhe italianë, të përfshirë në trafikun e sasive të mëdha kokaine dhe hashashi.
Në qendër të hetimit ndodhej një shtetas italian rezident në Kalabri, i dyshuar si organizatori kryesor i një strukture kriminale që vepronte në lagjen San Basilio të Romës. Së bashku me tre djemtë e tij, ai kishte ndërtuar lidhje të ngushta me një grup shqiptar, i cili luante një rol kyç në menaxhimin logjistik të trafikut ndërkombëtar të drogës.
Sipas hetimeve, pjesëtarët shqiptarë ishin përgjegjës për kordinimin e dërgesave të kokainës nga Amerika Latine përmes porteve në Spanjë dhe Holandë, dhe për transportimin e mëtejshëm të tyre drejt Italisë.
Pasi ngarkesat mbërrinin në portin strategjik të Gioia Tauros në Kalabri, ato merrenin në dorëzim nga grupet lokale të ’Ndranghetës, të cilat siguronin shpërndarjen në tregun italian.
Grupi dyshohet se ka trafikuar të paktën 1 ton kokainë dhe rreth 1.5 ton hashash në 80 episode të dokumentuara.
Hetuesit zbuluan gjithashtu raste të dhunës ekstreme: katër persona italianë akuzohen për rrëmbimin dhe torturimin e një trafikanti, duke i shkaktuar atij dëmtime serioze fizike dhe psikologjike.
Ngjarja u filmua me telefon dhe videoja u shpërnda brenda rrjetit për të përforcuar atmosferën e frikës dhe nënshtrimit.
Gjatë fazës hetimore, një ekspert i Europolit u vendos në Itali për të ndihmuar në krahasimin e të dhënave me databazat europiane. Europoli ofroi gjithashtu asistencë analitike dhe financiare, si dhe ndihmoi në shkëmbimin e informacionit mes hetuesve italianë dhe spanjollë. Ky bashkëpunim çoi në pesë arrestime të tjera në Spanjë, përpara goditjes finale ndaj rrjetit.
