Sekretari i Përgjithshëm i Partisë Demokratike, Gazment Bardhi me anë të një postimi në rrjetet sociale, ka reaguar lidhur me zyrtarin që u arrestua ditën e sotme, për operacionin e trafikut të drogës në Gjermani e Zvicër. Sipas Bardhit, punonjësi i zjarrfikëses në Tiranë i cili u arrestua ditën e sotme rezulton të jet patronazhist i Partisë Socialiste. Ai thotë ndër të tjera se ky është kriminalizim i politikës dhe se kjo është një masakër zgjedhore. Bardhi thotë se në këtë mënyrë u pengua ndryshimi që njerëzit donin më 25 prill. Gjithashtu sekretari i Përgjithshëm i PD-së, ka theksuar se nuk do të ndalen në betejën kundër kësaj pakice, që sipas tij po përdor çdo mjet për të tjetërsuar vullnetin e lirë të shqiptarëve.
“Ndalohen dy trafikantë droge dhe përgjimet tregojnë se kanë qenë të angazhuar në blerje votash për regjimin Rama-Doshi. Arrestohet për trafik droge një punonjës i zjarrfikëses në Tiranë dhe rezulton të jetë patronazhist i PS-së 👇. Ky është kriminalizimi i politikës, kjo është masakra zgjedhore e 25 prillit, kështu u pengua ndryshimi që njerëzit donin, me trafikantë droge e paratë e pista të drogës. Zhbërja e kësaj padrejtësie është dhe do të mbetet misioni ynë. Ne nuk do të ndalemi në betejën tone kundër kësaj pakice që përdor çdo mjet për të tjetërsuar vullnetin e lirë të shqiptarëve. Me shumicën e qytetarëve ne do të kthejmë legjitimitetin dhe demokracinë në vend”, shkruan Gazment Bardhi në rrjetet sociale.
