Ditën e djshme, kryeministri Edi Rama në një intervistë për italianen ‘Gazetta Dello Sport’, deklaroi se vite më parë është arrestuar në Bologna pasi ka kundërshtuar një funksionar të policisë.
Kjo shkaktoi bujë në rrjet pasi shumë persona akuzuan kryeministrin se ka bërë shkelje në plotësimin e formularit të vetëdeklarimit, duke mospranuar se ka qenë i arrestuar në Itali, pasi ai këtë duhet ta deklaronte që pas hyrjes në fuqi të ligjit, në dhjetor 2015, pasi sipas ligjit të gjithë të zgjedhurit duhet të bënin këto deklarime dhe kush kishte shkelje të ligjit humbiste mandatin.
Së fundmi, rreth kësaj çështjeje ka reaguar ish-ministri i Drejtësisë, Ylli Manjani, i cili ka hequr një paralele mes Ramës dhe ish-kryebashkiakut të Vorës, Agim Kajmakut, i cili është shpallur në kërkim për falsifikim dokumentesh.
Me anë të një reagimi në Facebook Manjani i ka bërë thirrje Prokurorisë që të marrë nën hetim kreun e qeverisë dhe të tregojë se është e pavarur.
“Opozitës padyshim që i është “fikur kandili” përderisa pranon një shkelës ligji në krye të qeverisë. Por kandili i fikur i opozitës nuk e zhbën faktin që ka qenë i arrestuar dhe nuk e ka deklaruar, sipas ligjit. E po sipas ligjit Edi Rama duhet të ishte nën hetim dhe jo në detyrë! Kajmaku s’ka bërë asgjë më shumë… Ndërkohë është momenti që Prokuroria të ndezë prozhektorët e ligjit të Dekriminalizimit. Nëse është e pavarur, ky është momenti ta tregojë,”-ka shkruar Manjani.
Sot Rama mohoi të jetë arrestuar dhe tha se bëhet fjalë për një sherr.