Pas arrestimit që bëri policia shqiptare të Bledar Ibrahimin, 28 vjeçari, i kërkuar nga autoritetet italiane, nën dyshimin e veprave terroriste, ka reaguar dhe ministri i Brendshëm i Italisë, Mateo Salvini. Ai ka shkruar në “Facebook” se falënderon policinë shqiptare për këtë arrestim, sipas tij, tepër të rëndësishëm.
Statusi i Mateo Salvinit:
Bledar Ibrahimi 28 vjeç u arrestua në Shqipëri, pasi kërkohej për terrorizëm ndërkombëtar. Në shtëpinë e tij në Milano janë gjetur pajisje kompjuterike, gjurmë të kontakteve me fundamentalistët islamikë dhe dokumente e video që lavdëronin xhihadin islamik.
Hetuesit dhe policia jonë ka bërë një punë të shkëlqyer. Gjithashtu falënderoj policinë e Tiranës për punën mjaft të mirë.
Asnjë lëshim ndaj kriminelëve dhe fanatikëve të cilët na sjellin luftë në shtëpinë tonë.
Kujtojmë se gjatë ditës së sotme u arrestua Bledar Ibrahimi, banues në Elbasan, me qëllim ekstradimin drejt Italisë, pasi Interpol Roma e ka shpallur në kërkim ndërkombëtar për veprën penale ‘Pjesëmarrje në organizatë terroriste’.
Ky person më parë është deportuar nga Italia si person i rrezikshëm për rendin dhe sigurinë publike në Itali, pasi dyshohet të jetë i përfshirë me organizata terroriste në Itali dhe Egjipt.
