Pasditen e sotme u arrestua dhe personi i gjashtë si i dyshuar në grabitjen e 9 prillit në Rinas.
Në vijim të veprimeve të kryera nga një grup i posaçëm hetimor, policia informon se është kapur R.H., 50 vjeç, lindur e banues në Pejë, i dyshuar si një prej autorëve të kësaj ngjarje.
Ai do të hetohet nga Prokuroria për Krime të Renda Tiranë, për veprën penale te “Vjedhjes me armë të kryer në bashkëpunim, në kuadër të grupit të strukturuar kriminal”, “Mbajtjes pa leje të municioneve.”
Grupi që po merret me zbulimin dhe gjurmimin e kësaj ngjarjeje kishte vënë në shënjestër dy persona që strehohen në zonën e plazhit në Durrës. Sot sipas informacioneve grupi operacional ka arrestuar njërin prej tyre.
Sipas “shqiptarja.com” prej ditësh ata janë në përgjim dhe survejim. Operacioni nga Tirana nisi pasditen e sotme, fillimisht me rrethimin e një perimetri 1 km nga disa efektivë civilë në zonën e plazhit, që kanë ardhur me katër makina pa u kuptuar dhe më pas kanë ndërhyrë duke e arrestuar. Policia ndërkohë ka theksuar se është një operacion i vështirë por po zbardhet hap pas hapi
Mirëpo Ragip Hajdini nuk është një emër i panjohur për mediat. 7 vite më parë ai është ndaluar si një prej të dyshuarve kryesor, i përfshirë në vjedhjen e 25 kilogramë floriri brenda në Dhomën e Dëshmive në Policinë e Kosovës.
Në shkurt të vitit 2012 kosovari, në atë kohë 42-43 vjeç, dyshohet se në bashkëpunim me disa persona të tjerë dhe ndihmën e një oficeri policie kanë grabitur sasinë e arit brenda rajonit të Policisë.
Pak muaj pas grabitjes në Kosovë, Ragip Hajdini, 42 vjec, lindur e banues në Pejë është ndaluar në doganën e Morinit duke hyrë në territorin shqiptar. Ai po hynte në territorin shqiptar duke udhëtuar me mjetin tip fuoristradë TOUAREG me targë zvicerane.
Asokohe, gjatë kontrollit të dokumentacionit të mjetit në sistemin TIMS rezultoi se ky mjet ishte denoncuar si i vjedhur në Çeki, në muajin qershor të vitit 2012.
