Izraeli ka kryer sulmin më të madh kundër Libanit prej kur palët janë pajtuar për një armëpushim një javë më parë, duke vrarë të paktën 11 persona.
Sulmi ka ardhur pasi grupi militant i Libanit, Hezbollah, ka gjuajtur një breshëri predhash si paralajmërim për ato që i ka cilësuar shkelje të armëpushimit nga ana izraelite.
Sulmi me predha ka qenë i pari i Hezbollahut kundër forcave izraelite pasi palët janë pajtuar për një armëpushim 60-ditor javën e kaluar.
Marrëveshja tejet e cenueshme parasheh dhënien fund të luftimeve që kanë nisur më shumë se një vit më parë mes Hezbollahut dhe Izraelit – në kuadër të zgjerimit të konfliktit të nxitur nga lufta shkatërruese mes Izraelit dhe Hamasit në Gazë.
Hamas, i konsideruar një grup terrorist nga SHBA dhe BE, po përballet me kërkesa të forta nga Presidenti i zgjedhur amerikan, Donald Trump.
Ai ka kërkuar që Hamas të lirojë menjëherë pengjet izraelitë që mbahen në Gazë, duke kërcënuar se nëse pengjet nuk lirohen deri në momentin që ai merr zyrtarisht pushtetin në janar, grupi do të përballet me pasojat.
Nuk dihet nëse Trump ka kërcënuar me një ndërhyrje të drejtpërdrejtë ushtarake amerikane në luftën e Izraelit në Gazë, por SHBA ka mbështetur Izraelin me ndihmë ushtarake dhe diplomatike gjatë këtij konflikti që ka zgjatur tashmë gati 15 muaj.
Lufta shpërtheu pas sulmeve të Hamasit në jug të Izraelit në tetor të vitit të kaluar, ku humbën jetën mbi 1.200 njerëz dhe u morën peng më shumë se 240 të tjerë.
Si pasojë e ofensivës hakmarrëse të Izraelit në Gazë janë vrarë më shumë se 44.000 njerëz, sipas të dhënave të autoriteteve shëndetësore palestineze.
