Gazeta greke “Ta NEA” ka zbuluar detaje tronditëse mbi një mega-operacion që po zhvillohet në Greqi, pas lëshimit të 28 urdhër-arresteve ndaj anëtarëve të disa grupeve kriminale të përfshira në trafik droge, vrasje dhe tentativa vrasjesh.
Gjatë hetimeve janë sekuestruar 200,000 euro, 1,000 rrënjë kanabis, armë, sasi droge dhe automjete. Megjithatë, numri i saktë i personave të arrestuar mbetet i paqartë.
Një nga të dhënat kryesore të hetimit lidhet me një i ri shqiptar, i cili u vra në Shqipëri në vitin 2022 pas një shpërthimi me eksploziv në makinën e tij. Ai rezulton të ketë pasur një rol kyç në një tentativë vrasjeje të kryer në vitin 2021 ndaj Ari Papës, një 32-vjeçar me origjinë nga Saranda, për arsye hakmarrjeje.
Dyshohet se snajperi që do të përdorej për atentatin ishte siguruar nga bashkëpunëtorët e të riut shqiptar dhe u dorëzua në një hotel, me qëllim që të kryhej eliminimi nga një ballkon që kishte pamje të qartë mbi një shesh ku frekuentonte viktima e synuar. Snajperisti ishte trajnuar për të qëlluar nga një distancë prej 100 metrash, por atentati nuk u realizua.
Hetuesit dyshojnë se urdhri për këtë tentativë ekzekutimi është dhënë përmes platformës Sky Ecc dhe se pas tij qëndron Aleksandër Sadikaj, i cili vetë u ekzekutua në Shqipëri.
