Kryeministri i vendit Edi Rama nën shoqërinë e ambasadores amerikane Yuri Kim dhe ministres së Punëve të Jashtme Olta Xhaçka, ka pritur në orët e para të së shtunës edhe dy avionë të tjerë me refugjatë afganë. Nëpërmjet një postim në rrjetet sociale kryeministri ka theksuar se deri më tani kanë mbërritur në vendin tonë 275 qytetarë të Afganistanit.
“MIRËMËNGJES PA U GDHIRË 😊
dhe nga Rinasi ku deri sot kanë mbërritur 275 të arratisur nga Afganistani fatkeq, ndër të cilët edhe gra aktiviste të shoqërisë civile, pedagogë, punonjës institucionesh, gazetarë, së bashku me familjet e tyre, ju uroj një fundjavë të qetë”, shkruan kryeministri në rrjetet sociale.
Sjellim në vëmendje se në orët e para të mëngjesit të ditës së djeshme erdhi edhe një avion me 121 afganë të cilët u evakuuan në qytetin e Durrësit. Dy avionët që mbërritën sot pritet të evakuohen në godinat e konvikteve të “Qytet Studentit”, të cilat janë përshtatur posaçërisht për ta. Fillimisht qytetarët afgan i janë nënshtruar kontrolleve mjekësore.
Kujtojmë se kryeministri i vendit, Edi Rama ka thënë se Shqipëria do të presë rreth 4000 afganë. Të cilët u detyruan të largohen nga Afganistani, pasi talebanët përparuan me shpejtësi në kryeqytetin e vendit Kabul dhe arritën të merrnin kontrollin‼
