Dhjetë ditë pas dorëzimit të vendimit të zbardhur të Apelit për masat e sigurisë ndaj zv.kryeministres Belinda Balluku dhe drejtorëve Gentian Gjyli dhe Erald Elezi, të akuzuarit ende nuk kanë paraqitur rekurs në Gjykata e Lartë.
Gazetarja e Top Channel, Anila Hoxha, ka kontaktuar avokatët e të dyshuarve, të cilët kanë bërë të ditur se do t’i drejtohen gjyqtares së Apelit të Posaçëm me kërkesë për t’u ridërguar një kopje e vendimit.
“Vendimi lexohet me shumë vështirësi sepse është printuar në eco mode”, ka deklaruar për Hoxhën avokati Julian Mërtiri, përfaqësues ligjor i Erald Elezit. Të njëjtin shqetësim kanë ngritur edhe dy avokatët e tjerë, Andi Skënderi dhe Ardian Kalia, të cilët thanë se gjatë këtyre ditëve kanë kërkuar që vendimi të printohet saktë për të mundësuar një lexim të qartë.
Në vendim argumentohet arsyeja pse është lënë në fuqi masa e ndalimit për të dalë jashtë Shqipërisë ndaj zv.kryeministres Balluku. Ky vendimmarrje iu dorëzua më 30 dhjetor avokatëve dhe mbrojtësve, si edhe dy zyrtarëve të tjerë që ndodhen nën masën e arrestit shtëpiak.
Sipas burimeve, gjyqtarja Miliana Muça arsyeton në vendimin e shpallur më 18 dhjetor se ekziston rreziku që zv.kryeministrja dhe ministrja e Infrastrukturës t’i shmanget drejtësisë, duke u bazuar te marzhi i dënimit që parashikon akuza e komunikuar ndaj saj. Në këtë kontekst, duke u mbështetur në shpjegimin ligjor që e lidh Ballukun me veprën penale të shkeljes së barazisë në tendera, gjykata ka vlerësuar të nevojshme mbajtjen e pasaportës së saj të bllokuar.
Me lënien në fuqi të vendimit të kolegut Erjon Çela, gjyqtarja e Apelit të Posaçëm ka sqaruar gjithashtu se nuk mund të shprehet për pezullimin nga detyra të zv.kryeministres, për sa kohë çështja është në shqyrtim në Gjykatën Kushtetuese. Pezullimi i këtij shqyrtimi do të zgjasë deri në marrjen e një vendimi përfundimtar nga Gjykata Kushtetuese, e cila pritet të mblidhet në seancë plenare më 22 janar 2026.
