Porti i Durrësit mirëpret një ngjarje unike kulturore anija “Art Explora”, e para në botë e shndërruar në muze lundrues, ka mbërritur në Shqipëri si pjesë e një turi mesdhetar që synon të sjellë artin dhe kulturën pranë publikut, plotësisht falas.
Nga data 10 deri më 21 prill, festivali shëtitës do të zhvillohet në bordin e anijes muze, e cila do të akostohet në port, si edhe në pavijonet e ekspozitave në skelë dhe disa hapësira kulturore në qytetin e Durrësit dhe në Tiranë.
Programi përfshin një mori aktivitetesh: ekspozita, përvoja me realitet virtual, konferenca, filma, instalacione artistike, lexime poetike, koncerte dhe punëtori të dedikuara për grupe të ndryshme, përfshirë nxënësit dhe organizatat e shoqërisë civile.
“Art Explora” nisi udhëtimin e saj në pranverën e vitit 2024 dhe do të ndalet në 15 destinacione të Mesdheut deri në vitin 2027. Këto ndalesa përzgjedhin qytete që janë historikisht të lidhura me qytetërimet e mëdha dhe ndërthurjen e kulturave mesdhetare.
Iniciativa synon të forcojë bashkëpunimin mes artistëve, kuratorëve, institucioneve kulturore, edukative dhe organizatave joqeveritare, duke ndërtuar së bashku një vizion të ri për Mesdheun si hapësirë e përbashkët kulturore.
Pesë prej ndalesave të anijes muze janë bashkëfinancuar nga Bashkimi Evropian përmes programit “Europa Krijuese”, duke theksuar rëndësinë e kësaj nisme si një urë bashkimi mes popujve përmes artit dhe eksperiencave të reja.
