Me fundin e mandatit të dytë të qeverisë socialiste, shqiptarët duket se do të “humbasin” edhe mundësinë e bërjes së check-up-it falas, që deri tani shteti e kishte mundësuar nëpërmjet PPP-së dhënë kompanisë së biznesmenes Vilma Nushi.
Por kësaj të fundit duket se qeveria ka vendosur që t’ia anulojë PPP-në e shumë debatuar, dhe më shumë se sa çështje politike, kjo duket se ka lidhje me mungesën e parave nga ana e financave shtetërore.
Kompania “3P Life Logistic”, e cila është në duart e sipërmarrëses Vilma Nushi, nuk do të ketë më në duar konçesionin e ‘check-up’-it që ka pasur prej kohësh, raporton “Dosja.al”.
Kjo gjë nuk dihet se sa do të zgjasë, por anulimi tashmë është konfirmuar edhe nëpërmjet dokumenteve që janë firmosur nga Ministria e Shëndetësisë, dhe bërë zyrtare.
Në dokumente, shihet se në një hark kohor prej pesë ditësh, është lajmëruar vijimi i ofrimit të paketës së shërbimeve të kontrollit mjekësor për grup-moshat 40-65 vjeç dhe shtyrja e ofrimit të këtij shërbimi.
Më datë 25 shtator, kompanisë në pronësi të Nushit, i është lajmëruar vijueshmëria e punës, ndërsa pas 5 ditësh më datë 30 shtator, asaj i është lajmëruar shtyrja e PPP-së.
Dokumenti
“Në vijim të shkresë së Ministrisë së Shëndetësisë dhe Mbrojtjes Sociale me Nr.560/10, datë 23.09.2020, protokolluar në Fond me Nr. 7020, datë 24.09.2020, me objekt rifillimin e zbatimit të kontratës koncesionare “Për paketën e shërbimeve të Kontrollit mjekësor bazë për grupmoshat 40-65 vjeç”, e ndryshuar, datë 07.01.2015, Drejtoritë Rajonale të fondit marrin masat e nevojshme për njoftimin e Qendrave Shëndetësore, për rifillimin e ofrimit të shërbimit të kontrollit mjekësor bazë, sipas objektit të kontratës koncensionare “Për paketën e Shërbimit të Kontrolleve për grupmoshat 40-56 vjeç”, të ndryshuar, datë 07.01.2015.
Duke ju falënderuar për bashkëpunimin, drejtore e Përgjithshme, Elisa Bërziu”,- shkruhet në dokumentin e datës 25 shtator 2020.
“Ministria e Shëndetësisë dhe Mbrojtjes Sociale në cilësinë e Autoritetit Kontrakues, kërkon nga ana juaj, marrjen e masave për njoftimin e Qendrave Shëndetësore për shtyrjen deri në një njoftim të dytë të fillimit të operimit të shërbimit. Sekretar i Përgjithshëm, Gerladina Prodani”,- lexohet në dokumentin që mban datën 30 shtator, ku lajmërohet edhe shtyrja.
Nga e gjithë kjo mbetet e paqartë nëse ky vendim ka lidhje me një ndryshim prioriteti nga ana e Ministrisë së Manastirliut, apo kjo është një krizë në marrëdhëniet mes qeverisë dhe koncensionit që në këtë rast është Vilma Nushi.
Por ajo që është e qartë është kriza ekonomike që po përfshin me shpejtësi Shqipërinë, dhe në radhë të parë financat e shtetit, i cili edhe pse duket sikur ka “hapur thesin” për fushatën elektorale të vitit 2021, përsëri i duhet të rrudhë disa nga PPP-të shumë milionëshe të dhëna fillimisht pa u kursyer për klientët e qeverisë.
/Burimi: Dosja.al/ Përshtati: GazetaReforma.com/
