Agjencia e Mbikëqyrjes Policore për Rajonin Fier–Berat ka ekzekutuar sot urdhrin e Prokurorisë, duke vënë në zbatim masat e sigurisë të vendosura nga Gjykata e Shkallës së Parë të Juridiksionit të Përgjithshëm Fier, ndaj 3 efektivëve të policisë dhe 3 punonjësve të Inspektoratit Kombëtar të Mbrojtjes së Territorit (IKMT) pranë Bashkisë Mallakastër.
Të gjashtë zyrtarët janë nën hetim për veprat penale “Shpërdorim detyre” dhe “Ndërtim i paligjshëm”. Masa e sigurisë e vendosur për ta është “Pezullim nga detyra” dhe “Detyrim për t’u paraqitur në policinë gjyqësore”.
Sipas hetimeve të zhvilluara nga AMP, me përdorimin e metodave speciale të hetimit, ekzistojnë dyshime të arsyeshme se këta zyrtarë kanë bashkëpunuar për të lejuar ndërtime të paligjshme në territorin e Bashkisë Mallakastër.
Zyrtarët e pezulluar janë:
• Inspektor Y.K., me detyrë Ndihmës Specialist / SPZ pranë Komisariatit të Policisë Fier
• Inspektor I.B., me detyrë Ndihmës Specialist / SPZ pranë Komisariatit të Policisë Fier
• Inspektor D.K., me detyrë Ndihmës Specialist / SPZ pranë Komisariatit të Policisë Fier
• Kryeinspektor A.X., me detyrë pranë IKMT, Bashkia Mallakastër
• Inspektor Sh.Xh., me detyrë pranë IKMT, Bashkia Mallakastër
• Inspektor K.Y., me detyrë pranë IKMT, Bashkia Mallakastër
AMP njofton se hetimet do të vijojnë për të zbardhur plotësisht veprimet dhe përgjegjësitë e secilit prej zyrtarëve të përfshirë.
