Ambasada e Shteteve të Bashkuara të Amerikës, në Tiranë me anë të një postimi në Facebook, shprehet se mbështet me forcë punën e pavarur dhe profesionale të Policisë së Shtetit dhe SPAK-ut.
Më tej në reagim thuhet se profesionistët e sistemit të drejtësisë – oficerët e policisë, prokurorët dhe gjykatësit – duhet të lejohen të bëjnë punën e tyre pa kërcënime dhe kanosje, pavarësisht kush është i pandehur. Pasi kjo është e vetmja mënyrë që shqiptarët të kenë sistemin profesional dhe të paanshëm të drejtësisë që meritojnë, dhe të ecin përpara drejt integrimit në BE.
Ndërkohë kujtojmë se dy goditjet më të mëdha që SPAK ka bërë janë dosja 339, dhe sekuestrimi i pronave të biznesmenit Ylli Ndroqi. Gjykata e Posaçme Kundër Korrupsionit vendosi seksuestro të 26 pasurive të Ylli Ndroqit bazuar në dyshimet e lindura pas hetimit pasuror nga SPAK, se ky i fundit rezulton të ketë qenë i përfshirë në veprimtari kriminale.Sipas SPAK, Ndroqi rezulton të ketë qenë i arrestuar për trafik ndërkombëtar të lëndëve narkotike bashkë me 7 persona të tjerë, gjatë një operacioni të kryer në Stamboll në vitin 1998, kur Ndroqi paraqitej me emrin Xhemail Pasmaçiu.
Reagimi i Ambasadës së SHBA
Ambasada e SHBA-së mbështet me forcë punën e pavarur dhe profesionale të Policisë së Shtetit dhe SPAK-ut. Profesionistët e sistemit të drejtësisë – oficerët e policisë, prokurorët dhe gjykatësit – duhet të lejohen të bëjnë punën e tyre pa kërcënime dhe kanosje, pavarësisht kush është i pandehur. Ka ardhur koha që të lejohen të kryejnë detyrat e tyre dhe të mbështeten përpjekjet e tyre për të luftuar krimin e organizuar. Kjo është e vetmja mënyrë që shqiptarët të kenë sistemin profesional dhe të paanshëm të drejtësisë që meritojnë, dhe të ecin përpara drejt integrimit në BE.
