Kryetarja e Lëvizjes Socialiste për Intgrim, Monika Kryemadhi, ka vazhduar turin elektoral për zgjedhjet e 25 prillit në qytetin e Vlorës këtë të shtunë. Në krah të Monikës ka qenë edhe kandidati që mban nr.1 në qarkun e Vlorës, Luan Rama. Ai ka mbajtur fjalimin hyrës të takimit elektoral, ku ndër të tjera ka theksuar se “sot jemi të gjithë bashkë për fitoren e LSI”-së, duke hedhur poshtë aludimet për përçarje brenda partisë.
“Vlora e bukur! Vlora e zemrës së Shqipërisë është sot këtu e gjitha e bashkuar, nën flamurin e Shqipërisë. E nderuar kryetare e LSI-së Monika Kryemadhi, mirë se ke ardhur në Vlorë! Ne jemi sot të gjithë bashkë, me zemër e me shpirt, të vendosur për fitoren e LSI-së. Jam më i emocionuari nga të gjithë. Jam sot bashkë me ju për të konfirmuar një punë të jashtëzakonshme, me pasion e vendosmëri, që kemi bërë në 7 muaj për ta ringritur LSI-në nga e para me djem e vajza të mrekullueshme. Jam këtu për të konfirmuar se e gjithë lista është mishërimi i kohezionit shoqëror, dhe mbi të gjitha i pasionit për t’i shërbyer Vlorës dhe Shqipërisë, vetëm me synimin që Shqipëria të jetë e para. Jam njëri nga 12 emrat, i barabartë mes të barabartëve në listën e LSI”, tha Luan Rama.
“Na kanë sulmuar, na kanë përgojuar, janë përpjekur të na poshtërojnë e përçajnë por nuk ia kanë dalë dhe nuk do ia dalin sepse LSI nuk është parti emrash, është parti zemrash”, theksoi ai.
“Është partia e zemrave, e guximit, e lëvizjes që do e çojë Shqipërinë përpara në procesin e integrimit evreopian, për ta bërë Shqipërinë atë, që nën thirrjen e “duam Shqipërinë si Evropa” u bënë bashkë e rrëzuan diktaturën do jenë bashkë edhe në 25 prill për të rrëzuar miksimin më të shëmtuar të klikës së regjimit të Rilindjes , shëmtia e të cilëve është gjëja më e rëndë në imazhin e Shqiperisë”, tha kandidati nr. 1 në listën e LSI.
Sjellim në vëmendje që së fundmi ka pasur aludime për një përplasje në radhët e LSI-së, ku ishte i përfshirë edhe Luan Rama. Vetë kryeministri Rama u shpreh gjatë një interviste televizive se Ilir Meta e ka “pushkatuar” politikisht kandidatin për deputet.
