Kanë kaluar më shumë se tetë muaj nga zhdukja pa gjurmë e alpinistit australian Cameron Twiss, dhe familja e tij vijon të kërkojë me ngulm zbardhjen e misterit që e rrethon këtë ngjarje.
Twiss, 28 vjeç nga Australia Jugore, ishte nisur për një udhëtim në shtegun malor prej 17 kilometrash që lidh Valbonën me Thethin, në veri të Shqipërisë, më 13 tetor 2024. Ai udhëtonte pa udhërrëfyes dhe vetëm, megjithëse një natë më parë kishte kaluar kohë me një grup turistësh në Valbonë.
Pas zhdukjes, autoritetet shqiptare gjetën sendet e tij personale dhe pasaportën në dhomën e një bujtine në Shkodër.
Për më shumë se dy javë, policia dhe ekipet e kërkim-shpëtimit patrulluan zonën nga toka dhe ajri, përfshirë përdorimin e dronëve, por pa sukses.
Duke mos pasur ende asnjë informacion, familja e Twiss ka angazhuar hetues privatë dhe ka nisur një fushatë për mbledhje fondesh për të vazhduar kërkimet. “Ende nuk kemi përgjigje”, shkroi vëllai i tij, Stuart Twiss, duke theksuar zhgënjimin për mungesën e çdo të dhëne konkrete.
Miqtë e Cameron-it shprehen të tronditur nga fakti që askush nuk ka raportuar ta ketë parë pas datës 13 tetor.
Një mike e tij, Purnima Flanagan, ndau mesazhet e fundit të dërguara prej tij një ditë para zhdukjes. Në mesazhin e fundit, Twiss shkruante se po pinte vodka me një burrë shqiptar që sapo kishte njohur.
“Ky ishte Cameron, i hapur, i shoqërueshëm dhe gjithmonë i gatshëm për të njohur njerëz të rinj,” tha Flanagan. “Thjesht është e pabesueshme që askush nuk ka parë asgjë. Ai ishte alpinist me përvojë dhe orientim shumë të mirë.”
Zhdukja e Twiss ka nxitur një sërë hipotezash, nga një sulm i mundshëm nga një kafshë e egër, një aksident në terrenin e vështirë, deri tek një rrëmbim. Rasti bëhet edhe më i mistershëm pasi vetëm dy muaj më parë një shtetas lituanez ishte zhdukur në të njëjtin segment malor.
Pavarësisht përpjekjeve të autoriteteve dhe hetimeve private, fati i 28-vjeçarit australian mbetet ende i panjohur. Familja e tij vijon të kërkojë ndihmë dhe transparencë për të zbardhur çfarë ndodhi në Alpet Shqiptare atë ditë tetori.
