Një seri tërmetesh të shpeshta pranë Campi Flegrei, një fushë vullkanike në Itali që dikur ka qenë aktive ka rritur ndjeshëm shqetësimin e shkencëtarëve për një rikthim të mundshëm të aktivitetit shpërthyes.
Vetëm këtë muaj u regjistrua një tërmet me magnitudë 4.4, më i forti në katër dekadat e fundit, që sipas vullkanologëve mund të jetë shenjë paralajmëruese e një procesi në zhvillim.
Gjatë gjashtë muajve të fundit, zona ka përjetuar mbi 3000 lëkundje sizmike dhe rritje të dukshme të emetimeve të gazrave, një tregues ky që magmat mund të jenë duke lëvizur drejt sipërfaqes.
Ekspertët e Institutit Italian të Gjeofizikës paralajmërojnë se toka po kalon nga përkulja në çarje, një fazë që mund të paraprijë një shpërthim të mundshëm vullkanik, i pari që nga viti 1538, që mund ta çojë botën në kaos.
Nëse ndodh, një shpërthim i tillë do të rrezikonte drejtpërdrejt mbi 4 milionë banorë në zonën e Napolit, por efektet mund të ndihen edhe më gjerë.
Shqipëria dhe vendet e tjera të Ballkanit do të përballeshin me pasoja të ndotjes atmosferike, reshjeve të hirit, ndikimeve në bujqësi, shëndetin publik dhe transportin ajror.
Shkencëtarët kujtojnë se 40,000 vjet më parë, Campi Flegrei ishte përgjegjës për një nga shpërthimet më katastrofike në historinë e planetit, me ndikim të drejtpërdrejtë në klimën globale.
