Mbrëmjen e djeshme hakerat iranianë kanë publikuar informacionet mbi hyrjet dhe daljet e kryeministrit Rama nga vendi.
Ndërkohë pas akuzave të shumta për udhëtimet me avionet luksoz, më në fund ka reaguar vetë Rama. Në shkrimin e tij kryeministri Rama gjithashtu nuk la pa shënjestruar opozitën duke e akuzuar për shpifje. Bashkëngjitur shkrimit ai ka bërë publike edhe shifrat e shpenzimeve të tij për udhëtimet jashtë.
“Shpifja monumentale e miliona € për tregon jo veç degjenerimin e rublaxhinjve të opozitës e gjobaxhinjve të ekraneve,po dhe përçmimin e tyre për shqiptarët: Shpenzimi mesatar vjetor i Kryeministrit për udhëtimet jashtë 2010 251.365Lek të reja 2021 64.972Lek të reja”, shkruan Rama.
Kreu i PD Sali Berisha në daljet e tij publike ka akuzuar drejtpërdrejt kryeministrin Rama duke u shprehur: “Skandali i Ramës me avionin privat shkon në të paktën 22 mln euro. Të japë dorëheqjen!”
Vlen të theksojmë se teksa kryeministri Rama disa ditë më parë “siguroi” shqiptarët se të dhënat e tyre janë të sigurta, si për ironi sot “dolën sheshit” informacionet e tij.
Ndërkohë që vetë të dhënat e kryeministrit të vendit janë në duart e hakerave iranianë, rrjedhimisht besueshmëria e qytetarëve në sistemet e institucioneve është e ulët. Bashkëngjitur materialit që është prej 3.6 MB shkruhet se qeveria shqiptare ka strehuar me taksat e shqiptarëve terroristët e MEK në Durrës.
