Ish-deputeti socialist Jurgis Çyrbja është thirrur për t’u marrë në pyetje nga prokurori Adnan Xholi, pas arrestimit të tij më 21 tetor.
Çyrbja përballet me tri akuza, përfshirë “Tregimin e sekretit shtetëror”, “Përkrahjen e autorit të krimit” dhe “Korrupsionin aktiv në zgjedhje”.
Prokuroria dyshon se Çyrbja ka informuar Altin Hajrin dhe individë të tjerë të shpallur në kërkim për operacionet e mundshme policore në Durrës, duke kërkuar mbështetje me vota për kandidimin e tij në zgjedhjet parlamentare të vitit 2021.
Po ashtu, SPAK ka lëshuar urdhër arresti për Ahmet Mashën, ndërsa Altin Hajri është shpallur në kërkim dhe po gjykohet për rrëmbimin dhe zhdukjen e Jan Prengës.
Në seancën e parë, Çyrbja ka mohuar akuzat dhe ka përjashtuar përdorimin e aplikacionit të koduar SKY ECC, që prokuroria pretendon se është përdorur për komunikime të dyshimta. Çështja është ende në proces, dhe pritet të ketë zhvillime në ditët dhe javët në vazhdim.
