Autoriteti Kombëtar i Ushqimit në Fier ka zhvilluar një aksion ku si pasojë janë mbyllur pesë ‘Fast Food-e’.
Në subjektet në fjalë janë gjetur shkelje dhe përveç gjobitjes AKU ka bërë edhe mbylljen e tyre. Ndërkohë behet me dije se pas kontrolleve nga AKU një subjekt tjetër është gjobitur me 50 mijë lek të reja.
Mbyllja dhe gjobitja e këtyre subjekteve është bërë për shkak të mungeses së kushteve higjenike.
Drejtori i AKU Fier, Gëzim Aliaj ka bërë me dije se ‘Fast Food-et’ në fjalë janë gjetur me shkelje dokumentacioni dhe mungesë të kushteve higjeno-sanitare. Për rastet në fjalë Drejtori i AKU, Fier ka thënë se në këto kushte kur disa subjekte thyejnë ligjin dhe kryejnë aktivitetin pa përmbushur detyrimet është i domosdoshëm ligji për penalizimin me burg të subjekteve që cënojnë sigurinë e shëndetit të konsumatorit.
Ndërkohë ndryshimet në Kodin Penal për sigurinë ushqimore që janë diskutuar së fundmi nga qeveria parashikojnë deri në 15 vite burg për ata subjekte që gjenden me shkelje.
