Opozita dhe AMT po zhvillojnë një protestë para Bashkisë së Tiranës, duke kërkuar dorëheqjen e kryebashkiakut Erion Veliaj.
Aktori Mehdi Malkaj, i pranishëm në protestë, u shpreh: “Po e vazhdoj aty ku e la Xhulja. Në periudhën e Henrit të 8-të të Anglisë, kishte një gjykatës që quhej Tomas Mur, i cili i dha të drejtë parlamentit dhe jo mbretit. Mbreti e thirri në audiencë dhe i tha, ‘Më thuaj parametrin tënd për drejtësinë.’ Tomas Mur, pasi u mendua pak, tha: ‘Shkëlqesi, unë kam një baba që e dua shumë, sepse ai ka sakrifikuar për mua, më ka rritur, më ka edukuar, më ka shkolluar dhe më ka bërë ky që jam. Babai im u ka shërbyer edhe juve, Shkëlqesi.’
‘Më thuaj parametrin tënd për drejtësinë, jo për babanë,’ i tha mbreti. ‘Shkëlqesi, nëse babai im do të ishte në gjyq me djallin, dhe djalli do të kishte të drejtë, unë do t’i jepja të drejtë djallit. Kjo është drejtësia,’ u përgjigj ai.”
Malkaj theksoi se vendi është në një situatë emergjence: “Për mua, nuk jemi në një kohë rotacioni të pushtetit, por në një emergjencë të madhe. Çfarë do të bëjmë? Duhet të ngrihet populli. Ngrijeni popullin nga gjumi, nuk bëhet ndryshe. Është fjala për përmbysje.”
Ai u shpreh i gatshëm të përballet me dhunën: “Do na rrahin ata? Le të na rrahin. Unë kam vetëm një problem, nuk më ngjiten kockat më.”
Malkaj bëri thirrje për reflektim ndaj policisë dhe shprehu dashurinë për atdheun: “Unë e dua Shqipërinë, e dua këtë flamur. Në emër të këtij flamuri kanë rënë të gjithë heronjtë e vërtetë. Ju policë, mendohuni një herë a ia vlen ta mbani atë uniformë? Edhe unë marr kërcënime!”
