Aksidentoi për vdekje të miturën sllovake, policia arreston 18-vjeçarin

Mbrëmjen e së dielës, një aksident i rëndë ndodhi në aksin rrugor Maminas-Gjiri i Lalzit, ku një 18-vjeçar ka përplasur një të mitur 8-vjeçare, duke i shkaktuar vdekjen. Policia ka arrestuar në flagrancë drejtuesin e mjetit, shtetasin G. Gj., për veprën penale të “Shkeljes së rregullave të qarkullimit rrugor”.

Sipas njoftimit të policisë, ngjarja ndodhi në segmentin rrugor “Maminas – Gjiri i Lalzit”, ku i riu G. Gj., banues në Tiranë, aksidentoi shtetasen S. S., 8 vjeçe, banuese në Sllovaki. E mitura u dërgua menjëherë në spital, por fatkeqësisht nuk arriti të mbijetojë.

“Sektori i Qarkullimit Rrugor arrestoi në flagrancë, për veprën penale ‘Shkelja e rregullave të qarkullimit rrugor’, shtetasin G. Gj., 18 vjeç, banues në Tiranë, pasi mbrëmjen e djeshme, në segmentin rrugor ‘Maminas – Gjiri i Lalzit’, duke drejtuar automjetin, ka aksidentuar shtetasen S. S., 8 vjeçe, banuese në Sllovaki, e cila humbi jetën në spital,” thuhet në njoftimin e policisë.

Policia po vijon hetimet për të zbardhur rrethanat e plota të aksidentit dhe për të përcaktuar përgjegjësitë e sakta të drejtuesit të mjetit.