Më 2 janar qyteti i Tiranës do tronditej nga një aksident me pasojë vdekjen e dy personave, ngjarje e ndodhur në rrugën “Xhanfize Keko”.
Si pasojë e përplasjes së dy makinave kanë mbetur viktimë Erion Balla 36-vjeç nga Rrësheni i Mirditës si dhe një grua 72-vjeç Hidajete Salliu banuese në Tiranë.
Sakaq, dy shoferët Edmond Murati dhe Etjon Lazri u vunë në prangat e policisë nën akuzën për veprën penale “Shkelje e rregullave te qarkullimit rrugor”.
LEXO: Aksidenti në Porcelan\ Gjykata merr vendimin për drejtuesit e automjeteve
Mirëpo, 4 muaj pas ngjarjes së rëndë, Etjon Lazri, i riu që u përfshi në këtë aksident, është liruar nga burgu.
Vendimi është marrë në fund të muajit prill nga Gjykata e Apelit Tiranë, e cila urdhëroi që Lazri, të lirohet nga burgu dhe momentalisht ai ndodhet në masën e sigurisë “arrest shtëpie”, raporton Shqiptarja.com.
Lirimi i të riut vjen në një kohë kur Prokuroria e Tiranës, ka vendosur të marrë të pandehur Lazrin dhe çështja kundër tij, ndodhet në gjykatën e Tiranës, në pritje për t’u futur në gjykim.
Kujtojmë se shkak i këtij aksidenti është bërë shpejtësia tej normave të lejuara të mjetit që drejtonte Etjon Lazri dhe një parakalim i gabuar, i njërës prej makinave që ndodhej në rrugë.
