Arrestohet shoferi i kamionit që aksidentoi për vdekje pasditen e djeshme 25 vjeçaren Arkineda Haskasa, punonjëse e sigurisë në Portin e Durrësit.
Njoftimi i Policisë:
“Specialistët e Qarkullimit Rrugor në Drejtorinë Vendore të Policisë Durrës arrestuan në flagrancë shtetasin F. K., 39 vjeç, banues në Malishevë, Kosovë, pasi më datë 07.01.2021, në ambientet e portit, duke drejtuar mjetin tip “Man” (trailer), ka aksidentuar shtetasen A. H., 25 vjeçe, e cila për pasojë ndërroi jetë. Materialet i kaluan Prokurorisë së Rrethit Gjyqësor Durrës, për veprime të mëtejshme”, njofton Policia.
Ngjarja
Ngjarja ndodhi rreth orës 15.30 në Portin e Durrësit, aty ku 25 vjeçarja punonte si punonjëse sigurie. E reja ka qenë në sheshin e Portit, në krye të detyrës, kur kamioni i drejtuar nga 39 vjeçari nga Kosova e ka tërhequr zvarrë për disa metra.
Reagimi i Autoritetit Portual Durrës
Sot e gjithë familja e madhe e APD-së është thellësisht e pikëlluar nga humbja tragjike e jetës e koleges tonë Artineda Haskasa. I shprehim ngushëllimet tona të përzemërta familjarëve dhe miqve të Artinedës dhe i gjendemi pranë familjes së saj në këto momente të vështira. Nuk do jeni kurrë vetëm!
Në bashkëpunim me Policinë e Durrësit dhe organet hetimore, të gjitha divizionet e APD-së janë angazhuar maksimalisht në funksion të zbardhjes së rrethanave të ngjarjes tragjike, në një territor të rëndësisë së veçantë! Uniforma që mbante veshur sot kolegia jonë, meriton respekt dhe mirënjohje pafund! Dritë të pastë shpirti!
/Gazetareforma.com/
