Një aksident i rëndë me pasojë vdekjen e dy adoleshenteve u regjistrua gjatë fundjavës në Bërzhitë.
Si pasojë e lagështisë në rrugë, mjeti i drejtuar nga 18-vjeçari Françesk Shaba, doli nga rruga dhe u përplas me një pemë.
“Panorama” shkruan, se pas aksidentit, i riu ka ecur disa metra dhe më pas ka humbur ndjenjat.
Shaba së bashku me dy pasagjeret 14-vjeçare u dërguan në spital dhe janë jashtë rrezikut për jetën.
Ndërkohë 17-vjeçaret Denada Tarja dhe Suada Serani humbën jetën në vend dhe familjet e tyre kanë hapur dyert e mortit.
Të plagosurit kanë marrë disa shembje në kokë dhe në trup dhe do të mbahen ende në spital.
Njoftimi i policisë
“Në aksin e vjetër rrugor, në Bërzhitë, automjeti me drejtues shtetasin F. SH., 18 vjeç, si pasojë e lagështirës, ka dalë nga rruga. Për pasojë, kanë ndërruar jetë dy nga 4 pasagjeret në automjet, D.T., 17 vjeçe dhe S.S., 17 vjeçe. Drejtuesi i automjetit F.SH., së bashku me dy pasagjeret e tjera O.M., 14 vjeç, dhe L.M, 14 vjeç ndodhen në SQU nën kujdesin mjekësor.”
