Një ngjarje tragjike është regjistruar në Indi. Ekipet e shpëtimit në Indi po përpiqen të gjejnë të mbijetuar pas një përplasjeje të tmerrshme që përfshiu tre trena, duke vrarë qindra njerëz në një nga katastrofat më të rënda hekurudhore që vendi ka parë ndonjëherë.
Të paktën 288 persona janë konfirmuar të vdekur dhe më shumë se 1000 të plagosur pas përplasjes mes dy trenave të pasagjerëve dhe një treni mallrash në qytetin Balasore, në shtetin lindor të Odisha, të premten.
Por ekipet e shpëtimit presin që numri i të vdekurve të rritet më tej, pasi shumë njerëz mendohet se janë bllokuar nën vagonët e përmbysur.
“Ne nuk shpresojmë shumë për të shpëtuar dikë të gjallë,” tha Shefi i Shërbimeve të Zjarrfikësve të Odisha, Sudhanshu Sarangi, për kanalin lokal të lajmeve NDTV.
Shkaku i rrëzimit mbetet i paqartë, por ministri indian i hekurudhave Ashëini Vaishnaë u tha gazetarëve të shtunën se një “hetim i nivelit të lartë” është urdhëruar për përplasjen, e cila ndodhi në Odisha verilindore, pranë stacionit hekurudhor Bahanaga.
Incidenti ka bërë jehonë në të gjithë Indinë, një komb prej 1.4 miliardë banorësh, duke nxitur thirrje të reja për autoritetet për të adresuar çështjet e sigurisë që kanë pllakosur hekurudhat e vendit për dekada.
