Detaje të reja janë bërë me dije në lidhje me aksidentin e rëndë të regjistruar mëngjesin e kësaj të marte në Prrenjas ku një makinë, pasi kishte humbur kontrollin u përplas me një mjet të parkuar anësh rrugës, duke lënë të plagosur 5 persona, mes tyre dhe një e mitur. Raportohet se shoferi Jetmir Daci ka qenë në gjendje të dehur në momentin e aksidentit. Një nga të aksiëntuarat, 23 vjeçe ndodhet në gjendje kome në spitalin e Traumës, ndërsa dy motrat e saj kanë marrë lëndime në disa pjesë të trupit. I plagosur ka mbetur dhe babai i vajzave, Artan Pishkashi dhe nëna e tij, (gjyshja e vajzave).
Në një intervistë për TCH, e moshuara ka rrëfyer momentin e aksidentit dhe ka treguar se këmbën e ka në allçi.
E moshuara: Këmbën e kam në allçi, brinjët dhe duart më janë dëmtuar. Kishte një ditëlindje çupa e vogël. Shkuam atje ne, sa u takuam ndodhi ajo që ndodhi, nuk mbaj mend më gjë prej aty. Erdhi i pirë ai, këta thonë kështu, po ku e pashë unë, se makina më kishte zënë sipër edhe mua edhe vajzën.
Ndërsa një familjar ka rrëfyer detaje të tjera. Ai shprehet se makina që drejtohej nga Daci, tip “Golf” ka qenë me shpejtësi të lartë dhe e ka marrë përpara makinën ku ndheshin të plagosurit. Ai shton se Daci mund të ketë me 200 km/h në momentin e aksidentit. Sipas tij, kur të aksidentuarit janë dërguar në spitalin e Librazhdit, ky i fundit nuk kishte as fasho për ti mjekuar.
I afërmi: Erdhi si kamikaz, u bë katastrofë, të plagosurit njëri mbi tjetrin. U ula të pija një kafe sa të vinte dhëndri. Më tha do pres gjyshen dhe do ikim te motrat. Sa hipi në makinë, vjen një Golf me shpejtësi, direkt makina u spostua dhe i mori para të katërt këta. Katastrofë çfarë të shikoje, njëri përmbi tjetrin. Si ato që bëjnë kamikazët. Nuk ka mundësi të ketë qenë defekt i makinës, ka qenë i pirë. Ka pasur aq shpejtësi, mbi 200 km në orë. U mblodhën shumë njerëz, erdhi ambulanca. Vajza e madhe është operuar në Tiranë, e vogla ka këmbën në allçi. Turp i Zotit që në Librazhd nuk kishte as një fasho.
Shoferi Jetmir Daci aktualisht po ndiqet në gjendje të lirë nga Prokuroria e Elbasanit. Ndërkohë është ngritur një grup i posaçëm hetimor për zbardhjen e shkaqeve të aksidentit.
