Një aksident i rëndë ndodhi mbrëmjen e së mërkurës, kur dy mjete u përplasën kokë më kokë në afërsi të fshatit Zemblak, duke shkaktuar vdekjen e menjëhershme të pasagjeres që udhëtonte në njërin nga automjetet e përfshira.
Policia e Korçës njofton se ka arrestuar dy drejtuesit e mjeteve, Trifon Mehmetin dhe Klaudio Kishtën, që ishin të përfshirë në aksidentin tragjik, ku humbi jetën 24-vjeçarja Zoi Ksila. Një automjet udhëtonte nga Bilishti drejt Korçës, ndërsa tjetri nga Korça drejt Kapshticës. Dyshohet se një manovër e gabuar nga njëri prej drejtuesve ka shkaktuar përplasjen fatale.
Sipas policisë, dinamika e plotë e ngjarjes do të përcaktohet pas përfundimit të ekspertizës, e cila pritet të hedhë dritë mbi përgjegjësitë e drejtuesve të përfshirë. Hetimet vazhdojnë për zbardhjen e rrethanave të këtij aksidenti tragjik.
Aksi nacional Korçë-Kapshticë ka shpesh herë qenë burim aksidentesh, përfshirë edhe ato fatale, veçanërisht në kryqëzimet e tij, të cilat konsiderohen “njolla të zeza” për policinë rrugore.
