Shoferi i betonieres, Aleksandër Krrashi, 24 vjeç, është arrestuar nga policia pas aksidentit të rëndë që ndodhi në Fushë Prezë, ku humbën jetën katër të rinj. Ai akuzohet për tre vepra penale: “Largimi nga vendi i aksidentit”, “Shkelje e rregullave të qarkullimit rrugor” dhe “Drejtimi i automjetit në mënyrë të parregullt”.
I riu nuk kishte leje drejtimi për mjetet e transportit të rëndë. Ai ka deklaruar se u largua nga vendi i ngjarjes pasi ishte i tronditur nga aksidenti.
Hetimet paraprake tregojnë se betonieria nuk kishte shenja dalluese ndriçuese në momentin që hyri në rrugën kryesore. Ajo vijoi lëvizjen për disa metra përpara se të përplasej me automjetin tip Benz, ku ndodheshin katër të rinjtë.
Nga të dhënat e deritanishme, mjeti tip Benz po lëvizte me shpejtësi të tejkaluar, çka mund të ketë ndikuar në përplasjen fatale. Pas impaktit të fortë, automjeti mori flakë, duke i marrë jetën Enejdi Laçit, Erildi Laçit, Enrikejd Kurtit dhe Andi Laçit.
Të rinjtë sapo kishin dalë nga aeroporti i Rinasit, ku kishin pritur Erildi Laçin, i cili kishte ardhur nga Gjermania.
Paralelisht, autoritetet po kryejnë hetime edhe mbi pronarët dhe administratorët e firmës që kishte punësuar Aleksandër Krrashin, për të verifikuar pajisjen e tij me leje drejtimi dhe përgjegjësinë e kompanisë në këtë tragjedi.
Hetimet vijojnë për të përcaktuar me saktësi shkaqet dhe rrethanat e plota të aksidentit.
