Të afërm të familjes Gushi dhe qytetarë të Fierit kanë dalë sot në protestë për të kërkuar drejtësi për aksidentin fatal në rrugën Levan-Vlorë. Ngjarja e rëndë i mori jetën 4 anëtarëve të familjes, mes tyre dy vajzat e mitura, 14 dhe 9 vjeçe.
Familjarët kanë thënë se nuk duan hakmarrje, por kërkojnë të drejtën e tyre. Ndër të tjera ata kanë thënë se familja e 22-vjeçarit Igli Madani, që shkaktoi aksidentin duke goditur nga pas makinën në familjes, as nuk u ka trokitur në derë.
“Me inkurajimin dhe mundësinë që na japin neve për të vazhduar për t’u bërë thirrje të gjithëve se kjo që na ndodhi ne mund t’i ndodhë çdo familje., Ne jemi njerëz të thjeshtë,. Kërkojmë drejtësi, nuk kërkojmë hakmarrje. Ai babai i atij djalit duhet të na dilte ballë përballë., Duhet të na trokiste në derë sepse ne jemi njerëz”, tha njëri prej të afërmve.
Në protestë ishte gjithashtu motra e Silvana Gushit, 33-vjeçarja që ndërroi jetë në aksidentin fatal. Mes lotësh ajo ka thënë se në familjen e tyre është hapur një plagë shumë e madhe dhe kërkon drejtësi për fëmijët e vegjël që humbën jetën në aksident.
“Na ka mbyllur një derë. Në familjen tonë është hapur një plagë shumë e madhe që nuk mbyllet kurrë. Kërkoj drejtësi sidomos për ato dy fëmijë të vegjël , që ne na dhemb zemra më shumë për ato të dyja që shikoni këtu, sesa për motrën. Unë dua drejtësi”, ka thënë ajo e përlotur.
