Patos– Një aksident automobilistik ka ndodhur ditën e sotme pranë stadiumit “Alush Noga”.
Bëhet me dije se një automjet tip ‘Mercedes Benz’ për të shmangur përplasjen me një mjet tip ‘Seat’, ka dalë nga rruga dhe përfunduar në një parkim aty pranë, ndërsa automjeti tjetër është përplasur me murin rrethues të stadiumit.
Makina ‘Mercedes Benz’ drejtohej nga një grua, dhe kishte si pasagjere dy gra të tjera dhe një fëmijë 2 vjeç, të cilët si pasojë e aksidentit kanë pësuar disa dëmtime të lehta.
Ndërkohë në stadium po zhvillohej ndeshja Albpetrol- Memaliaj dhe pas zhurmës së dëgjuar, tifozët kanë dalë nga stadiumi për tu dhënë ndihmë e parë të lënduarve.
Të plagosurit po transportohet drejt Spitalit Rajonal Fier, por mësohet se janë në gjendje të mirë shëndetësore teksa identitetet nuk janë zbuluar.
Në vendin e ngjarjes kanë mbërritur unifromat blut, të cilat po punojnë për të gjetur edhe shkaqet e aksidentit
Kujtojmë se aksidentet e shumta rrugore kanë bërë që masat ndaj shoferëve të shtohen dhe muajin që lamë pas policia paralajmëroi se shumë shpejt, përveç dregerit të alkoolit, do përdorë edhe dragerin për të parë nëse drejtuesit kanë konsumuar lëndë narkotike.
Po ashtu, ministri i Brendshëm, Sandër Lleshaj deklaroi se për herë të parë në Shqipëri shoferët do t’i nënshtrohen të ashtuquajturit ‘testi i idiotit’, për të parë gjendjen e tyre psikologjike kur efektivët shohin sjellje të dyshimta.
Ndryshime pritet të bëhen në Kodin Rrugor, ku parashikohet që drejtuesit e rinj të automjeteve të kenë më shumë penalizim se të tjerët dhe kjo masë parashikon që shoferët të cilët kanë më pak se 3 vite që kanë marrë patentën do të ndëshkohen 50 % më shumë për disa nga shkeljet e qarkullimit rrugor, si: parakalimet e gabuara, për përdorimin e alkoolit, mosdhënien e përparësisë, e disa shkelje të tjera.
Masa do merren gjithashtu edhe për këmbësorët, pasi parashikohet një rritje e gjobës për ta, e cila do fillojë nga 1 mijë deri në 4 mijë lekë.
Ndryshime në Kodin Rrugor, ashpërsohen masat për shoferët e rinj dhe këmbësorët
