Një aksident i rëndë ka ndodhur gjatë natës në autostradën Fier–Lushnje, pranë fshatit Saver, ku janë përplasur një furgon pasagjerësh dhe një automjet luksoz tip Benz AMG 63. Ngjarja u regjistrua pas mesnate dhe, sipas të dhënave paraprake, mjeti AMG 63 që po udhëtonte me shpejtësi të lartë, ka goditur nga pas furgonin që transportonte udhëtarë në linjën Vlorë–Tiranë, me destinacion aeroportin e Rinasit.
Përplasja ka qenë e dhunshme. Benz-i ka thyer barrierat metalike anësore, ka përfunduar në një kanal kullues dhe është përfshirë nga flakët. Ndërkohë, furgoni është shtyrë rreth 100 metra nga vendi i aksidentit për shkak të goditjes së fuqishme.
Nga përplasja janë lënduar 7 persona, mes tyre edhe pasagjerë të furgonit. Tre prej tyre ndodhen në gjendje të rënduar dhe po marrin trajtim mjekësor në Spitalin Rajonal të Lushnjes.
Në vendin e ngjarjes ndodhen shërbimet e policisë rrugore, që po kryejnë hetimet për të përcaktuar shkaqet e sakta të aksidentit.
