Një aksident i rëndë ka ndodhur në aksin nacional Berat-Dimal, në afërsi të “Kthesës së Lapardhasë”, ku një automjet tip “Toyota” ka dalë nga rruga dhe është përplasur me një shtyllë të tensionit të lartë.
Sipas gazetares Eneida Petova drejtuesi i automjetit, Dhimitër Papa, është dërguar në Spitalin Rajonal të Beratit, ku po merr ndihmë mjekësore pas plagëve të marra.
Fatmirësisht, ai ndodhet jashtë rrezikut për jetën dhe nuk ka dëmtime serioze.
Shkaku i aksidentit mendohet të jetë lagështira në rrugë, ndërsa policia rrugore është në vendngjarje për të zbardhur shkaqet e këtij incidenti.
Përveç dëmtimeve të automjetit, aksidenti ka shkaktuar gjithashtu dëme në lidhjet e linjës elektrike të zonës për shkak të përplasjes me shtyllën e tensionit të lartë.
Në zonë kanë shkuar edhe punonjësit e OSHEE-së, të cilët kanë nisur riparimin e dëmtimit të shkaktuar nga përplasja,për të rikthyer sa më shpejt energjinë elektrike në këtë zonë.
