Pasditen e sotme ka ndodhur një aksident i rëndë në Gjazë të Lushnjës ku një person ka humbur jetën teksa i jepte motorit.
Lajmi është bërë i ditur nga deputeti socialist Erion Braçe, i cili ka postuar pamjet në llogarinë e tij në Instagram bashkë me shkrimin ku bën thirrje që personat të cilët i japin motorit të vendosin gjithmonë maskë.
Në foton që Braçe ka postuar, shihet se motori është rrëzuar në anë të rrugë dhe njerëz të zonës kanë rrethuar viktimën i cili ka përplasur kokën në bordurë.
Ende nuk dihet identiteti apo mosha e burrit, ndërsa mësohet se ai ka ndërruar jetë rrugës për në spital.
Postimi i plotë:
E rëndë! Sapo, tani!
Aksident me motor në Gjazë, banori i Gjazës ka gjetur vdekjen! Ka dalë nga rruga dhe është përplasur me kokë në bordurë! Humbi jetën rrugës për në spital.
Unë nuk di çfarë të them më! Nuk vlen motori se sa jeta oooo njerëz të mirë! Një kaskë në kokë do u shpëtonte jetën! Më dëgjoni! Mos refuzoni! Vini maskat në kokë nëse doni të ngisni motorët. Su ka faj as policia e as Erion Braçe.
Mësohet se viktima është shtetasi me inicialet A.S, 63 vjeç i cili duke drejtuar motomjetin e tij, dyshohet se ka pësuar infarkt dhe është përplasur me bordurën.
Grupi hetimor i ndodhur në vendngjarje po punon për zbardhjen e plotë të rrethanave të ngjarjes.
Njoftimi i Policisë:
Lushnjë
Informacion paraprak
Sot rreth orës 17:10, në fshat Gjazë, Lushnjë, shtetasi A. S., 63 vjeç, duke drejtuar motomjetin tip “Yamaha”, dyshohet se mund t’i ketë rënë infarkt dhe ka ndërruar jetë.
Grupi hetimor po punon për përcaktimin e shkakut të vdekjes.
