Një aksident i rëndë rrugor është regjistruar mëngjesin e sotëm rreth orës 09:30, pranë urës së Kardhiqit, në hyrje të Gjirokastrës, në një nga nyjet më të rëndësishme të qarkullimit në jug të vendit.
Në ngjarje janë përfshirë një autoambulancë që po transportonte një pacient nga Tepelena drejt spitalit rajonal të Gjirokastrës dhe një automjet tjetër që udhëtonte në drejtim të kundërt.
Sipas informacioneve paraprake, automjeti tip BMW me targa TR8732L dyshohet se i ka prerë rrugën autoambulancës me targa AB220AT, duke shkaktuar një përplasje të fortë.
Si pasojë, autoambulanca ka dalë nga rruga, ndërsa automjeti tjetër është dëmtuar rëndë në pjesën e përparme.
Nga aksidenti janë plagosur gjashtë persona: drejtuesi i ambulancës, pacienti që po transportohej, një shoqëruese, infermierja dhe dy personat që ndodheshin në automjetin tjetër.
Mësohet se gjendja më e rëndë shëndetësore i përket pacientit, ndërsa të tjerët ndodhen jashtë rrezikut për jetën dhe po marrin trajtim mjekësor.
Forcat e policisë rrugore kanë mbërritur menjëherë në vendngjarje dhe kanë nisur hetimet për të përcaktuar rrethanat dhe shkakun e saktë të aksidentit.
Aksi Gjirokastër-Tepelenë-Sarandë mbetet një ndër më të ngarkuarit gjatë sezonit turistik dhe shpesh raportohen incidente për shkak të qarkullimit të dendur dhe shpejtësisë së lartë.
