Një ngjarje e rëndë ka ndodhur mbrëmjen e kaluar në zonën e “Pallatit me Shigjeta” në Tiranë, ku një aksident rrugor është shndërruar në një përplasje të dhunshme mes disa personave, duke përfshirë edhe të shtëna me armë zjarri.
Sipas burimeve policore dhe dëshmitarëve në vendngjarje, përplasja nisi si ndjekje me makina nga zona e “Misto Mames”, ku një BMW X5 me targa angleze ndiqte me shpejtësi një Mercedes-Benz me targa AB 090 FA.
Tensioni mes palëve vijoi në rrugë, deri sa mjetet u përplasën pranë semaforit te “Pallati me Shigjeta”, duke goditur edhe dy automjete të tjera, një Volvo dhe një mjet tjetër blu, të cilat qëndronin të ndaluara në semafor.
Fatmirësisht, nga aksidenti nuk raportohet për të lënduar, por vetëm dëme materiale.
Pas përplasjes, situata ka degjeneruar në dhunë fizike. Personat e përfshirë dolën nga makinat dhe u përleshën me leva hekuri, ndërkohë që ka dyshime të forta se është përdorur edhe armë zjarri.
Një predhë e paplasur u gjet në vendngjarje, ndërsa disa dëshmitarë raportuan se dëgjuan të shtëna.
Autorët braktisën mjetet dhe u larguan në këmbë, duke vrapuar mes lagjeve për t’i shpëtuar ndjekësve, ndërsa të tjerët vijonin ndjekjen me armë në dorë.
Policia mbërriti menjëherë në vendngjarje, bllokoi zonën dhe nisi këqyrjen e perimetrit, përfshirë automjetet e përfshira dhe kamerat e sigurisë.
Deri tani, autorët janë shpallur në kërkim dhe hetimet janë në zhvillim për identifikimin dhe arrestimin e tyre.
Po ashtu janë marrë në pyetje edhe drejtuesit e dy makinave që ndodheshin në semafor në momentin e përplasjes.
