Bashkëshortja e kryebashkiakut të Tiranës, Erion Veliaj, Ajola Xoxa, është paraqitur sot në ambientet e Prokurorisë së Posaçme, ku pritet t’i komunikohet zyrtarisht akuza në lidhje me dosjen “Veliaj”.
Sipas hetimeve të SPAK, Xoxa është një ndër personat e dyshuar për përfshirje në skema të dyshuara abuzive me fondet publike.
Prokuroria bën me dije se bashkë me bashkëshortin e saj, Erion Veliaj, ajo ka marrë pjesë në ngritjen dhe funksionimin e një mekanizmi të strukturuar për përfitime të parregullta financiare, përmes përdorimit të fondeve publike të Bashkisë së Tiranës në mënyrë të fshehtë dhe të paligjshme, me synim pasurimin personal dhe familjar.
Fillimisht, ndaj Xoxës ishte vendosur masa e sigurisë “arrest në shtëpi”, por pas vlerësimit nga Gjykata e Posaçme, kjo masë u zbut në “detyrim paraqitje”.
Ndaj saj rëndojnë disa akuza të rënda: “Korrupsion pasiv i funksionarëve të lartë shtetërorë ose të zgjedhurve vendorë”, kryer në bashkëpunim (në 9 raste), “Pastrimi i produkteve të veprës penale ose veprimtarisë kriminale”, si dhe “Mosdeklarimi apo deklarimi i rremë i pasurisë dhe interesave private”, sipas ligjit për personat që kanë detyrimin ligjor të deklarimit.
Hetimet për këtë dosje vijojnë, ndërsa SPAK pritet të zgjerojë më tej rrethin e personave nën hetim.
