Mediat greke vazhdojnë të shkruajnë për një nga ngjarjet më të bujshme që tronditi opinionin publik në vendin e tyre.
Bëhet fjalë për vrasjen makabre të studentes greke Eleni Topaloudi, me të cilën u abuzua seksualisht e më pas trupi i saj u hodh në det nga dy të rinj.
Dy personat e akuzuar për këtë ngjarje janë shqiptari Aleksandër Luca dhe shoku i tij grek.
Në Greqi është duke vazhduar gjyqi ndaj këtyre dy personave.
Në një deklaratë për mediat vendase ka dalë nëna e studentes e cila u ka bërë thirrje autoriteteve greke që dy autorët e ngjarjes të dënohen me burgim të përjetshëm.
Ajo është shprehur se nuk mundet të durojë më, pasi jeta e saj është shkatërruar. Nëna e studentes greke është shprehur kështu:
“Unë jam shumë keq. Vajza ime ishte thjesht një studente. Jeta ime është shkatërruar. Nuk kam më jetë. Unë jam një person i gjallë, por i vdekur.
Thjesht jetoj me kujtime në shtëpinë time dhe me qirinj, për të mbajtur mend time bijë. E kemi dërguar vajzën me sakrifica në shkollat më të mira në Rodos”.
E dëshpëruar, nëna e viktimës është shprehur se vajza e saj u mashtrua nga shqiptari dhe se do që ta shohë pas hekurave për gjithë jetën, së bashku me shokun e tij bashkëpunëtor në krim.
“Unë si nënë dua t’i shoh pas hekurave përjetë vrasësit e time bijë. Ata më vranë vajzën time. Ata janë përbindësha. Të ndryshohet ligji.
Të dënohen në mënyrë shembullore, me burg të përjetshëm. Ata e meritojnë. Nuk mund të duroj dot më”, e ka mbyllur deklaratën e saj nëna e studentes së ndjerë.
