Listës për investitor strategjik i është shtuar së fundmi edhe Dukagjin Lipa, babai i këngëtarëes së njohur Dua Lipa. Sipas lajmeve që qarkullojnë në media Dukagjini po zhvillon një projekt në fushën e energjitikës në zonën e Fierit. Më konkretisht bëhet fjalë për një park fotovoltaik me kapacitet prodhimi 100 megavat/orë. Me çmimin 1 euro metri, investimi e tejkalon vlerën e pronës, kështu që siç e njeh ligji, ai bëhet automatikisht dhe pronar i tokës. Ish- kandidati për kryebashkiak të Lushnjes, Eduart Sharka ka deklaruar në një intervistë për Syri Tv se Lushnja është tokë bujqësore dhe nuk ka nevojë për parqe fotovoltaike. Sipas tij kjo është një shkelje e ligjit me të dyja këmbët.
Sharka: Emisioni i ‘Piranjave’ ka bërë një investigim për një park të vogël të tillë në Plug të Lushnjes, që është zemra e tokës bujqësore. Te e gjithë Bashkia e Lushnjës nuk mund të bëhet fjalë për parqe të tillë sepse ka një tokë të një cilësie të lartë. Nëse ka një klasifikim të tokës së punueshme për produket bujqësore, Lushnja fillon nga A. Për mua ëhtë shkelje me dy këmbë e ligjit. Po lexoja se në Bullgari para një viti kishte filluar arrestimet për falsifikimet e cilësisë së tokës, pikërisht për këto parqe fotovoltaike dhe jam i bindur dhe e them me garanci të plotë që nuk ka shanse të jetë në përputhje me ligjin një sipërmarrje e tillë, sepse Lushnja nuk ka tokë për të humbur për parqe fotovoltaike. Dihet që ne jemi të fundit në Europë për tokë të punueshme për frymë të popullisë. Është dhe ana tjetër që bujqësia është prioritet strategjik tek ne dhe bien ndesh dhe është një lajm shumë i keq në këtë aspekt.
Ndërkohë edhe Akil Kraja, shefi i Kabinetit të Kryetarit të Partisë Demokratike, njëkohësisht edhe ekspert ekonomie shprehet se “investitorët e huaj, në veçanti diaspora, duhet të jenë më se të mirëpritur në Shqipëri, por problemi qëndron te personalizimi në ekstrem i vendimmarrjeve të një qeverie, e cila po punon gjithçka vetëm për të mbrojtur skandalet e saj, për të bërë propagandë dhe për të abuzuar me mirëbesimin e këtyre partnerëve”.
