Dita e sotme shënuan një ngjarje historike për vendin tonë, pasi më në fund janë hapur negociatat e integrimit me Bashkimin Europian.
Komisioneri për zgjerim i BE, Oliver Varhelyi është gjetur përballë pyetjes se kur mund të ketë një datë për anëtarësimin e Shqipërisë në BE. Në përgjigjen e tij komisioneri la të kuptohej se kjo varet nga progresi i Shqipërisë.
“Sa herë që Shqipëria është gati dhe sa herë që shohim që mund të ecim më shpejt, ne do të lëvizim më shpejt. Komisioni do t’i bëjë propozimet sa më shpejt të jetë e mundur”, tha Varhelyi.
Ndërkohë kur komisioneri u pyet nëse çfarë do të ndodhë me ata gjyqtarë dhe prokurorët të shkarkuar nga vettingu, nëse do të dënohen, Varheley tha se BE nuk do të sprapset nga kërkesat e saj, duke shtuar se ka disa raste që duhen zgjidhur sa i takon gjyqësorit.
“Klasteri i parë që do hapet dhe do mbyllet i fundit është shteti ligjor. Do punojmë me shtetin ligjor dhe dukshëm, gjendja e gjyqësorit do të diskutohet. Vetëm mund t’ju konfirmoj se ne nuk kemi për t’u sprapsur për kërkesat tonë. Duhet të ketë prova që ka, raste që duhen zgjidhur. Dhe këto duhen zgjidhur”, tha Varheley.
Kujtojmë që 16 vite më parë, Shqipëria firmosi Marrëveshjen e Stabilizim-Asocimit, ndërsa në qershor të vitit 2014, Shqipëria mori statusin e vendit kandidat për në BE.
Në marsin e vitit 2020, Këshilli Europian vendosi të hapë negociatat për anëtarësimin e Shqipërisë në union. Sot (19 korrik) me mbajtjen e konferencës së parë ndërqeveritare nis zyrtarisht çelja e negociatave.
