Organizata Ndërkombëtare për Migracionin (IOM) ka deklaruar se nuk do të marrë pjesë në asnjë zhvendosje të detyruar të popullsisë së Rripit të Gazës.
Ky qëndrim vjen pas propozimit të ish-presidentit amerikan, Donald Trump, për të larguar banorët palestinezë nga territori i shkatërruar nga lufta.
Në fillim të shkurtit, Trump shkaktoi reagime të ashpra ndërkombëtare duke sugjeruar që SHBA të marrë kontrollin e Rripit të Gazës, ta rindërtojë dhe ta shndërrojë në një zonë të re të zhvilluar, të cilën e quajti “Bregu Blu i Lindjes së Mesme”.
Pjesë e këtij plani ishte edhe zhvendosja e banorëve të Gazës në Egjipt dhe Jordani, pa të drejtë kthimi një ide e refuzuar menjëherë nga qeveritë e dy vendeve.
Megjithëse Trump deklaroi të shtunën se nuk ka ndërmend të imponojë këtë propozim, ideja e tij vijon të përballet me kundërshtime të forta, veçanërisht nga vendet arabe.
Drejtori i përgjithshëm i IOM, i cili vizitoi Rripin e Gazës javën e kaluar, e përshkroi situatën si katastrofike, me qytete të rrënuara dhe njerëz të pastrehë që përpiqen të mbijetojnë në kushte ekstreme.
Ndërkohë, Mbrojtja Civile në Gaza raportoi se gjatë javës së fundit, gjashtë të porsalindur humbën jetën për shkak të një vale të ftohtë që ka prekur rajonin. Edhe pse armëpushimi në fuqi prej 19 janarit ka lehtësuar hyrjen e ndihmave humanitare, qindra mijëra palestinezë vazhdojnë të jetojnë në tenda.
Hamasi ka akuzuar Izraelin për bllokimin e materialeve të ndërtimit dhe shtëpive të parafabrikuara, të domosdoshme për rreth 2.4 milionë banorët e Gazës, shumica e të cilëve janë zhvendosur të paktën një herë gjatë konfliktit.
