Vetëm 7 ditë pasi Fryma e Re Demokratike firmosi marrëveshjen e koalicionit me Partinë Demokratike dhe aleatët e vegjël, në zyrë i shkoi një letër që kërkonte lirimin e ambienteve të selisë brenda 10 ditësh.
Në përmbajtje letra dukej e falsifikuar, pasi në kokë mbante stemën e Bashkisë së Tiranës, por pa numër protokolli dhe referuar dokumentit të shpërndarë për mediat nga FRD-ja edhe pa vulë e firmë të titullarit që kishte urdhëruar lirimin e selisë së FRD-së.
Letra mbante vetëm datën 3.3.2021 dhe i kërkonte z. Shehi që brenda 10 ditësh të lironin ambientet me argumentimin se i duheshin vetë bashkisë për stafin e saj dhe një arsye tjetër ishte se do të rikonstruktohej.
“Bashkia e Tiranës është në proces të vazhdueshëm të sistemimit të zyrave për stafin dhe njësitë administrative. Nisur nga ky fakt dhe nevoja për rikonstruksionin e godinës nga amortizimi, ju kërkojmë që të lironi ambientet që ndodhen në katin 3 në godinë, në rrugën ‘Abdi Toptani’, Tiranë. Lutemi nga ana e juaj të bashkëpunoni me Bashkinë e Tiranës, për marrjen e masave për lirimin e ambienteve brenda 10 ditëve nga marrja e njoftimit”, shkruhej në letrën që mbante në kokë stemën e bashkisë, por pa numër protokolli, emër titullari dhe pa firmë e vulë.
10 ditë më pas, pikërisht ditën e djeshme më 12 mars në hyrje godinës tri katëshe, ku ndodhen edhe zyra të tjera të Bashkisë së Tiranës ishin vendosur punonjësit e Policisë Bashkiake dhe nuk lejonin zyrtarët e FRD-së që të futeshin në ambientet e selisë.
DETYRIMI LIGJOR
Nëse ky veprim i Policisë Bashkiake ishte në zbatim të ligjeve apo jo, kjo mbetet për t’u gjykuar nga drejtësia, por ajo që mund të evidentojmë është se ligjvënësit në ligjin për partitë politike në nenin 22 parashikojnë ndihmën që i jep shteti partive politike për të për të kryer veprimtarinë të tyre.
Neni 22 pika “b” parashikon që subjektet që kanë marrë në tri zgjedhjet e fundi mesatarisht 1% të votave në shkallë vendi, shteti ka detyrim që t’u garantojë zyra.
“Partitë parlamentare pajisen me ndërtesë për selinë e tyre qendrore dhe zyra vendore. Këtë të drejtë e ka edhe partia politike, mesatarja e votave të së cilës në tri zgjedhjet e fundit parlamentare ka qenë mbi 1 për qind në shkallë vendi. c) Nëse partia politike është pajisur me ndërtesë me kontratë huapërdorjeje, sipas këtij ligji, por nuk plotëson kushtet e parashikuara në shkronjën “b” të këtij neni, atëherë ka të drejtën e lidhjes së kontratës së qirasë për ndërtesën, për ta përdorur vetëm për selinë apo zyrat e saj vendore. Rregulla më të hollësishme përcaktohen me vendim të Këshillit të Ministrave, me propozim të Ministrit të Brendshëm.”, shkruhet në nenin 22 pika “b” e “c”.
Por, a i përmbush këto kritere Fryma e Re Demokratike?
Nga një verifikim i bërë në dy zgjedhjet që ka marrë pjesë Fryma e Re Demokratike rezulton se në votimet e 2013, FRD-ja ka marrë 1.7% të votave në rang kombëtar, ndërsa në 2017 ka marrë 0.33% të votave në rang kombëtar. Mesatarja e dy zgjedhjeve të fundit është mbi 1.
Në bazë të këtyre rezultateve “Ligji për Partitë Politike” detyron shtetin që t’i sigurojë zyra subjektit në fjalë.
URDHRI I DYTË
Duket se bashkia e kryeqytetit nuk tërhiqet nga iniciativa për të nxjerrë nga godina FRD-në. Pasi letra pa firmë e vulë nuk funksionoi, në zyrën e FRD-së shkoi një akt konstatim nga Policia Bashkiake, ku akuzonte FRD-në për zaptim të ambienteve të bashkisë dhe me një urdhër të kryetarit të Bashkisë kërkohej lirimi i menjëhershëm.
Ndërkohë, nuk thuhet se në bazë të cilave ligje e përjashton./Panorama
