Kryetari i Partisë Demokratike, Lulzim Basha ka ngritur akuza të frota ndaj kryeministrit Rama për lidhjet e tij me bandat e krimit. Duke iu përgjigjur pyetjeve të qytetarëve gjatë rrugës së tij për në Durrës, Basha ka thënë se restoranti privat në Kryeministri pret 2 apo 3 herë në ditë krerët e bandave të Shqipërisë. Kryedemokrati është shprehur se këta krerë bandash darkojnë me paratë e shqiptarëve në restorantin privat. Basha ka thënë se Shqipëria ka nevojë për një kryeministër në lartësitë e duhura që ka prioritet ndarjen e politikës nga krimi. Ai ka garantuar se do të jetë model ii kryeministrit që promovon sipas meritës.
“Po promovove kriminelët, trafikantët, po drekove e darkove me ta në Kryeministri, nëse kryeministri jep këtë model, çfarë pret nga specialistët? E di unë, e dini ju, e dinë mediat, restoranti privat në Kryeministri, një herë në 2 apo 3 ditë ka krerët e bandave të Shqipërisë, darkojnë me paratë tuaja në restorantin privat të Kryeministrisë. Shqipëria ka nevojë për një kryeministër në lartësinë e pritshmërive tuaja. Një kryeministër që prioritet ka ndarjen e politikës nga krimi. me mua kryeministër garantoj se modeli do jetë ai i promovimit të specialistëve, sipas meritës. Për këtë do kemi ndihmën partnerëve tanë”, deklaroi Basha.
