Një shtetas shqiptar është ekzekutuar me armë zjarri ditën e sotme në Itali. Bëhet fjalë për 28-vjeçarin Santino Xhyra, i cili banonte në Itali dhe është vrarë pasditen e sotme në qytetin e Barit.
Sipas mediave italiane, 28-vjeçari Xhyra ndodhej në afërsi të shtëpisë ku banonte prej tre vitesh në zonën Liberta të Barit, në “via Petrelli”. Ai është qëlluar tre herë me armë zjarri, në bark dhe në gjoks.
Kanë qenë banorët e zones ata që e kanë marrë të riun dhe e kanë dërguar menjëherë në spital në mënyrë që të merrte ndihmën e nevojshme mjekësore, por fatkeqësisht Xhyra nuk ia ka dalë dot mbanë t’i mbijetonte plagëve të marra dhe ka ndërruar jetë.
Bëhet me dije se shqiptari i vrarë pasditen e sotme në Bari nuk rezulton të jetë i skeduar si pjesë e ndonjë organizate kriminale më herët, megjithatë ai ka pasur disa precedentë penalë. Policia dhe grupi hetimor ndodhen aktualisht në vendin e ngjarjes ku janë duke mbledhur prova për të bërë të mundur zbardhjen e ngjarjen së rëndë ku mbeti i vrarë 28-vjeçari.
Për momentin pista kryesore që po ndiqet në hetimet e policisë është ajo larjeve të hesapeve, ndërsa policia ka dyshime se edhe autorët e krimit mund të jenë gjithashtu shqiptarë.
Ndërkohë, janë publikuar edhe foto nga vendi i ngjarjes ku duket policia që është duke mbledhur prova për të vazhduar më tej hetimet e vrasjes së ndodhur.
