Situata e COVID-19 në vendin tonë paraqitet mjat e rëndë, teksa spitalet janë të mbushura plot. Gazetari Erion Skëndaj ka raportuar se spitali Infektiv dhe Sanatoriumi kanë qenë plot. Ai ka thënë se vetëm në 24 orët e fundit në Infektiv kanë mbërritur 40 urgjenca. Ndërsa spitali COVID-2 (Sanatoriumi) është i mbushur plot.
“Në sanatorium deri në 8 të mbrëmjes vetëm 3 urgjenca, për shkak të mbushjes së këtij spitali. Të paktën në një javë kohë, të gjitha urgjencat e Tiranës dhe jugut të vendit kanë ardhur në Infektiv dhe tani konsiderohet totalisht i mbushur. Ka informacione se nga sot, urgjencat e Jugut i kanë kaluar Sanatoriumit. Të dy spitalet nuk kanë shtretër të lirë. Në dy spitalet COVID kryesorë, numri i të shtruarve është i plotë, në Sanatorium janë 220 persona të shtruar, në Infektiv 120 po aq sa janë dhe shtretër.
Kritike paraqitet situata edhe te COVID 3 ku janë zënë 95 % të kapaciteteve dhe ka forma më të rënda të trajtimit të pacientëve edhe pse është për rikuperim. Po ashtu, një numër të madh urgjencash ka edhe në spitelet e rretheve.
“Tek Covid 3 janë rreth 140 shtretër të zënë, domethënë 95% e kapacitetit e mbushur dhe po ashtu dhe në spitalin 4. Atje ka dhe forma të rëndë të trajtimit me oksigjeno terapi me dy ose më shumë burime dhe pse është më shumë për rikuperimin e pacientëve. Ka një mbushje të shpejtë të spitalit Infektiv në Durrës, me një urgjencë ditore që shkon me dhjetëra raste, e njëjta situatë dhe në Shkodër, Elbasan etj”, raportoi ai.
Gazetari ka folur edhe për numrin e rasteve e të vdekjeve nga COVID duke thënë javën e fundit ka pasur 12 vdekje më shumë se një javë më parë.
“Në 7 ditët e fundit, 20-27 shkurt, janë 7.153 raste pozitive nga 26.503 testime te kryera. Shkalla e pozitivitetit 1 në 3.7 ose 27%. 3.726 testime, -54 testime.
Mesatarja e Rasteve të reja pozitive në javën aktuale 1.021 ndërsa në javën pararendëse 1.010, -11. Në 7 ditët e fundit kanë ndërruar jetë 122 pacientë me COVID-19, mesatarisht 17.4 në 24 orë, ndërsa në javën pararëndëse numri i fataliteteve ishte 110, pra 12 më shumë, me një mesatare ditore 15.7 fatalitete në ditë. ”, ka thënë Skëndaj
