Disa prej votave të diasporës kanë dalë të pavlefshme në Kosovë. Ky lajm është bërë i ditur nga Kryetarja e komisionit Qendror Zgjedhor, Valdete Daka, e cila ka pohuar se Prokuroria Speciale është duke bërë hetime për disa nga votat e diasporës.
Ajo u shpreh se nuk mund të dalë në një njoftim rreth kësaj çshtje pasi i takon Prokurorisë dhe sistemit të Drejtësisë të prononcohet.
“Prokuroria Speciale ka bërë një hetim për disa vota nga diaspora, dhe përderisa prokuroria nuk del me një njoftim, as unë nuk mund të bëjë njoftim sepse nuk mund të përzihem në hetimet që janë duke u bërë”, mësohet të ketë thënë kryetarja e KQZ, Valdete Daka.
Mbledhja e KQZ-së ka përfunduar pak më parë, ku gjatë zhvillimit të saj u shoqërua me debate, pikërisht mbi çështjen e votave të diasporës.
Më 14 shkurt, ditë që përkoi edhe me Shën Valentinin, qytetarët e Kosovës por edhe ata që jetojnë jashtë vendit zgjodhën me votë emrat që do të jenë pjesë e parlamentit të ri. Në zgjedhjet në Kosovë garuan 28 subjekte politike për 120 vende në parlament. Në zgjedhjet e jashtëzakonshme parlamentare të 14 shkurtit, të drejtë vote kishin 1.794.862 qytetarë. Pjesëmarrja në votime ishte 46.90 %, më shumë se në vitin 2019.
