8190 doza vaksinash të reja priten të mbërrijnë sot në Shqipëri. Lajmi u bë i ditur nga vetë ministrja e Shëndetësisë dhe Mbrojtjes Socilae, Orgeta Manastirliu, nga foltorja e Kuvendit. Mësohet se këto doza do të vijnë nga kompania Pfizer.
“Bota sot është e ndarë në dy kategori shtetesh. Shtetet që e kanë nisur fushatën e vaksinimit dhe ato që nuk kanë marrë asnjë dozë. Janë 140 vende që nuk e kanë nisur vaksinimin. Kemi mbi 4600 infermierë më të mbrojtur për shkak të vaksinimit. Ne kemi bërë përpjekje për të siguruar një kontratë me Pfizer për 500 mijë vaksina nga e cila kanë mbërritur 8000 doza deri më sot dhe pritet lëvrimi i 8190 doza të tjera po sot. Janë dhe 400 të moshuar mbi 80 vjeç dhe kujdestarësh më të mbrojtura për shkak të vaksinimit. Shumica dërrmuese janë qytetarë të zakonshëm.”, tha Manastirliu.
Kujtojmë se aktualisht në vendin tonë po vijojnë procesin e vaksinimit blzuat e bardha, ndërsa iu nënshtruan procesit dhe të moshuarit mbi 80 vjeç.
Sa i përket planit të paraqitur deri tani nga qeveria është që brenda 14 muajve të mbarojë vaksinimi i grupeve më të rrezikuara, dhe sipas kryeministrit Edi Rama e gjitha kjo varet nga numri i vaksinave që janë porositur por që nuk dihet ende se kur do të vijnë.
Gjendja aktuale e dozave , pa përfshirë dozat e sotme që priten të vijnë, janë rreth 9140, të cilat mjaftojnë për 4570 persona.
