Gentian Zenelaj është një nga personazhet e njohura që vetëm pak kohë më parë u përball me koronavirusin dhe humbi edhe të atin nga sëmundja vdekjeprurëse. Ai kishte treguar më herët se nuk e kishte kaluar aspak lehtë infektimin, ndërsa një gjë të tillë e ka konfirmuar edhe në një intervistë në emisionin “Fitstation” në News 24. Aktori ka thënë se virusi i kishte prekur më shumë se gjysmën e mushkërisë dhe se e ka kaluar në formën më të rëndë të mundshme. Zenelaj ka thënë se nuk arrinte dot as të lidhte këpucët e të ecte në një korridor 15 metra, teksa frika më e madhe e tij ka qenë të braktiste fëmijët në një moment mjaft delikat për ta.
“E kalova vetë në kurriz është një sëmundje e tmerrshme. Unë kam pasur 55% prekje të mushkërisë. E kam kaluar në formën më të rëndë të mundshme dhe një djalë që deri në nëntor zhytej 20 metra, në 4 janar nuk lidhja dot këpucët, nuk bëja dot një korridor 15 metra. Cudia më e madhe është që kjo sëmundje sa më i shëndetshëm të jetë njeriu aq më shumë e sulmon, është si një krimb që zgjedh mollën më të shëndetshme, sigurisht shumëfishon sëmundje sipas mendimit tim personal. Do kujdesin maksimal, nuk duhet anashkaluar në asnjë moment, sepse bën kthesë brenda ditës. Pata shumë frikë për fëmijët, mendova që i braktisa në momentin më delikat të jetës së tyre. Kisha frikë dhe për veten, por kisha një frikë shumë të madhe për familjarët e mi,” –ka rrëfyer Gentian Zenelaj.
