Kryeministri Rama është shumë entuziast për zgjedhjet e 25 prillit dhe ka besim të palëkundur se do të fitojë. Gjatë një vizite në qytetin e Vlorës, i pyetur nëse do të largohet nga Partia Socialiste nëse humbet, ai u përgjigj me një shprehje që e thonë shpesh shqiptarët
“Ne kemi një shprehje për hallën dhe xhaxhain. Unë nuk di të flas me nëse… Unë di që do t’i fitojmë zgjedhjet”, – tha kryeministri.
Më tej ai ka folur për bilancet e mandatit të dytë duke thënë se qeveria e tij ka bërë shumë duke marrë parasysh nga ku është nisur. Për Ramën, të vetmet që e kanë ndërprerë progresin kanë qenë tërmeti dhe pandemia.
“Shumë parashikime që kisha u prenë prej tërmetit dhe pandemisë, por gjithsesi është i suksesshëm sa i përket menaxhimit të këtyre të dyjave. Ky mandat është mandat që më lë mua personalisht shijen e pakënaqësisë pasi kemi për të bërë shumë më tepër. Por të shohim nga u nisëm. Shqipëria që kemi sot nuk ka të krahasuar me atë që kishim para 7 vitesh”,– ka thënë ai.
Do të jenë shqiptarët ata që më 25 prill do të vendosin nëse Rama ka bërë vetëm mirë në këto 7 vite. Në fakt bilancet janë të qarta për gjithësecilin. Varfëria, papunësia, emigracioni masiv kanë shoqëruar vendin gjatë dy mandateve të Ramës. Nëse ka një mandat të tretë, me shumë mundësi do të jetë vetëm vazhdimi i dy të parave.
