Kryeministri Edi Rama vijon sërish me premtimet boshe në prag zgjedhjesh elektorale. Kësaj rradhe ndodhet në Vlorë, ku premton krijimin e një qendre inovacioni digjital.
Njësoj sikur në Korçë, Rama foli sërish për të rinjtë që mund të fitojnë shuma të mëdha parash në një vend me ekonomi si Shqipëria, e aq më tepër me një rrogë minimale të pandryshuar prej vitesh.
Rama theksoi se kjo qendër do t’i ofrojë shumë mundësi të rinjve, të cilët pa lëvizur nga qyteti, mund të punojnë në tregun global dhe të përfitojnë deri në 10 mijë euro fitime.
Vetëm 65 ditë larg nga fushata zgjedhore, Rama po bën tentativa të vazhdueshme për të afruar të rinjtë në partinë e tij me idenë se premtimet dhe shifrat që përmend kryeministri do të besohen gjerësisht.
Në situatën e pandemisë, shumë biznese e kompani kanë falimentuar duke rritur kështu ndjeshëm papunësinë në vend.
Deri më tani nga ana e qeverisë nuk ka asnjë plan rimëkëmbje të bizneseve apo ekonomisë, por vetëm premtime boshe në kohë fushate.
Reagimi:
“Kjo do të kthehet në objekt publik dhe do të jetë një qendër e cila do të ketë disa komponentë. Një nga komponentët kryesorë do të jetë qendra për të gjithë proceset e IT për të rinjtë, në mënyrë që ta krijojmë rrjetin dhe bërthamën e nisur në Tiranë me Tumon, me Korçën që ka avancuar për ta pasur këtë qendër tek biblioteka e re. Në Vlorë kemi një aset fantastik që do të transformohet dhe t’i japim mundësi të rinjve të kenë mundësi të trajnohen dhe të hynë në botën e të gjithë shërbimeve globale online. Ti i japin mundësi që pa lëvizur nga Vlora të jenë të punësuar në tregun global dhe të kenë paga që shkojnë nga 1 mijë euro në ditën e parë në 5, 10, në varësi nga aktiviteti që kryhet. Kjo është e ardhmja në fakt, e atyre që sot janë 15, 16, 19-vjeç në aspektin e punësimit. Do të ketë dhe hapësirë për të moshuarit, kalamajtë, shërbime publike që janë të përqendruara dhe që ofrojnë mundësira të drejtpërdrejta me qytetarët”, tha Rama.
