Janë gjithnjë e më të shumtë zërat që konfirmojnë se në vendin tonë kanë mbërritur variantet e reja të koronavirusit. Ndër to ka qenë edhe epidemiologu Fabian Cenko, i cili ka folur lidhur me këtë temë i ftuar në ABC Neës. Cenko ka thënë se nuk ka dyshime që mutacionet e virusit kanë mbërritur në vendin tonë pasi numri i rasteve është shtuar ndjeshëm dhe nuk dihet cilat shkaktohen nga variantet e reja.
“Virusi ka një përhapje më të gjëra në popullatë. Nëse i përgjigjen mutacioneve të reja, ato nuk i dimë. Nuk dimë sa % e rasteve shkaktohen nga mutacionet. E përbashkëta e tyre është që kanë një transmetueshmëri më të madhe. Unë nuk besoj se ka dyshime se këto mutacione janë mes nesh. Nuk ka dyshim, ajo që nga ana epidemiologjike do të përbënte lajm është se cila është % e rasteve që mbështeten në këto mutacione të reja. Do të ishte e vlefshme që të bëhen një përmbledhje e shpërndarjes edhe sipas moshave. Zgjidhja e parë për të cilën jemi të vonuar, por jo vetëm ne, vaksina, ku vihet re një reflektim pozitiv mbi rastet dhe zgjidhja e dytë kontrolli i shpërndarjes mbi rastet.”-ka thënë Cenko.
Ndër të tjera mjeku ka folur edhe për imunitetin e tufës duke thënë se variantet e reja mund të ndikojnë duke bërë që të duhet një pjesë më e madhe e popullsisë për t’u arritur.
“Imuniteti i tufës, duhet të bëjmë pak kujdes, pasi është një fakt i mirënjohur në shumë sëmundje, besohet se edhe te covid mund të luajë rolin e vet, por përballë shtameve të reja që nuk shmangin mbrojtjen imunitare, edhe imuniteti i tufës në rastin më të mirë mund të kërkojë një mbulesë të popullatës, një % më e madhe, dhe në rastin më të keq, shtamet e reja të mos i kapin dhe të gjendemi në historinë e gripit stinor që ndryshon.”- u shpreh Cenko.
